Diabetic Retinopathy: Pagsusuri sa Iyong mga Mata

Ang iyong kasaysayan ng kalusugan

Maaaring itanong ng iyong tagapangalaga ng mata ang tungkol sa anumang problema sa iyong paningin. Kasama rito ang:

• Malabong paningin o pagkaduling

• Hirap makakita sa gabi

• May kumikislap o lumulutang

Maaari nilang itanong ang tungkol sa:

• Uri at kasaysayan ng iyong diabetes

• Mga paggamot tulad ng insulin

• Kung nagkaroon ka ng pagbabago sa iyong pagkontrol ng asukal sa dugo kamakailan lamang

• Paano mo sinusuri ang lebel ng iyong asukal sa dugo

• Kung nagkaroon ng diabetes ang sinumang miyembro ng pamilya

• Kung nagkaroon ng diabetic retinopathy ang sinumang miyembro ng pamilya

• Anumang sakit ang nagkaroon ka, kabilang ang mataas na presyon ng dugo o sleep apnea

• Anumang operasyon o pamamaraan na nagkaroon ka

• Ano-anong gamot (parehong inirereseta at over the counter), herbal, bitamina, o supplement ang iniinom mo

Ang eksaminasyon ng iyong mata

Gumagamit ng tsart para sa mata at iba pang kagamitan ang iyong tagapangalaga ng mata upang suriin ang iyong paningin. Pagkatapos, sinusuri niya ang iyong mga mata para sa anumang sakit. Bibigyan ka ng pampatak sa mata para palakihin (dilate) ang iyong mga pupil o balintataw. Maaari kang sumailalim sa 1 o higit pa sa mga pagsusuring ito:

• Tonometry.  Sinusukat nito ang presyon ng likido sa mata.

• Slit lamp exam.  Tinitingnan sa pagsusuring ito ang istruktura ng iyong mata.

• Ultrasound. Lumilikha ito ng larawan ng mata gamit ang sound waves. Maaari itong gamitin kung may makitang dugo sa malinaw na gel na pumupuno sa mata (vitreous).

• Ocular coherence tomography (OCT). Lumilikha ang pagsusuring ito ng larawan ng retina gamit ang light waves. Ipinakikita nito kung may tumatagas na likido sa ilang bahagi ng mata. Nasusukat din nito kung gaano kakapal ang retina.

Fluorescein angiography

Maaaring isagawa ang pagsusuring ito para suriin ang panloob na lining ng mata (retina). Sinusuri din nito ang maliliit na daluyan ng dugo (capillaries) na nagdadala ng dugo sa retina. Sa panahon ng pagsusuri:

• Bibigyan ka ng pampatak na magpapalaki sa iyong pupil.

• Pagkatapos, may ituturok na tina sa dugo sa pamamagitan ng iyong braso o kamay. Dadaloy ang tina sa mga maliliit na ugat (capillaries) sa mata.

• Kukuhanan ng litrato ng tagapangalaga ang retina. Mas madali makita sa mga litrato ang maliliit na ugat dahil sa tina. Tumutulong ito sa tagapangalaga upang malaman kung mayroon at kung nasaan ang problema.

Maaari kang makaramdam ng pagduduwal sa maikling panahon ng pagsusuri. Maaaring manilaw ang iyong balat, mga mata, at ihi sa loob ng ilang oras pagkatapos ng pagsusuri. Makipag-usap sa iyong tagapangalaga upang malaman ang higit pa sa pagsusuring ito.