Doulè Abdominal

Koz doulè abdominal yo

Gen anpil bagay ki lakoz doulè abdominal. Koz nou plis jwenn pou granmoun yo se:

• Konstipasyon, dyare, oswa gaz

• Enflamasyon lestomak ak entesten an akoz yon viris oswa yon bakteri (gastwo anterit)

• Asid gastrik la k ap remonte nan gòj ou (refli asid)

• Refli asid grav, yo rele maladi gastwoezofajyen (gastroesophageal reflux disease, GERD)

• Yon doulè nan doubli lestomak la oswa ti entesten an (ilsè peptik)

• Enflamasyon vezikil bilyè a, fwa a, oswa pankreya a

• Pyè nan ren

• Apenndisit 

• Blokaj entestinal 

• Yon ògan ki ap peze yon mis oswa yon lòt tisi (èni)

• Enfeksyon irinè

• Kranp lè w gen règ ou

• Fibwòm nan matris

• Kis nan ovè

• Maladi pelvyen anfle lakay fi

• Andometriyoz

• Maladi Crohn

• Rektokolit emorajik

• Sendwom entesten irite

Dyagnostike koz doulè abdominal la

Founisè swen sante ou a ap fè w fè yon egzamen fizik. Sa a se pou yo ka jwenn kisa ki lakoz doulè ou genyen an. Si li nesesè, w ap gen tès pou w fè. Vant fè mal gen anpil koz posib. Sa ka pran yon ti tan pou yo jwenn sa ki koz ou gen doulè a. Bay detay sou kalite doulè ou santi a. Di founisè w si li fò oswa anba anba. Di l ki kote ak kilè ou santi doulè a. Di l kisa ki fè li mye oswa ki fè li vin pi mal. Epi di l si ou gen lòt sentom tankou:

• Lafyèv

• Fatig

• Kè plen (anvi vomi)

• Vomisman

• Chanjman nan abitid twalèt ou

• San nan twalèt ou oswa twalèt nwa, twalèt tankou goudwon

• Pèdi pwa sanzatann

Di founisè w la:

• Si ou gen moun nan fanmi w ki gen pwoblèm lestomak oswa pwoblèm entesten oswa kansè, nan fanmi w

• Konsènan jan ou itilize alkòl ak jan ou itilize nenpòt dwòg ilegal

• Tout medikaman ou pran, ni sa yo preskri w ni sa ou pran san preskripsyon

• Ki vitamin, remèd fèy, ak lòt sipleman ou pran

Trete doulè abdominal

Kèk koz doulè konn nesesite tretman medikal an ijans touswit. Tankou apenndisit oswa blokaj entestinal. Gen lòt pwoblèm ki ka trete ak repo, likid, oswa medikaman. Founisè swen sante w la kapab ba ou enstriksyon. Ou ka bezwen tretman oswa swen pou tèt ou dapre sa ki lakòz doulè ou a.

Si w ap vomi oswa gen dyare, bwè dlo oswa lòt likid klè. Lè ou ka manje manje ki solid ankò, kòmanse ak ti kantite. Manje ti kantite manje ki fasil pou dijere epi ki pa gen anpil grès. Tankou, konpòt pòm, pen griye, oswa bonbon sèl.

Rele 911

Rele 911 touswit si ou:

• Ou pa ka twalèt epi ou ap vomi

• Ap vomi san

• Ap dyare san oswa dyare tou nwa, tankou goudwon

• Ou gen doulè nan pwatrin ou, nan kou w, oswa nan zepòl ou

• Ou santi tankou w ap dekonpoze (endispoze)

• Ou gen doulè nan omoplat ou epi ou anvi vomi

• Ou gen gwo vant fè mal, sanzatann

• Ou gen nouvo doulè ki pi di pase sa ou te konn santi anvan an

• Ou gen vant balonnen, ki di, e ki fè ou mal si yo touche li

Kilè pou w rele founisè swen sante w la

Rele founisè swen sante ou a imedyatman si w gen nenpòt nan sa yo:

• Doulè ki vin pi mal oswa ki pa soulaje

• Balonnman ki vin pi mal oswa ki pa soulaje

• Dyare ki vin pi mal oswa ki pa soulaje

• Lafyèv 100,4°F (38°C) oswa pi wo, oswa jan yo endike sa a

• Pèt pwa san okenn rezon

• Kontinye pèdi apeti

• San nan twalèt ou

Kijan pou w evite doulè abdominal

Men kèk pratik pou ede ou evite doulè abdominal:

• Manje ti kantite manje pandan chak repa.

• Pa manje grès, bagay fri, oswa manje ki gen anpil grès.

• Pa manje manje ki ap ba ou gaz.

• Fè egzèsis regilyèman.

• Bwè anpil likid.

Pou ede ou evite sentom yo:

• Sispann fimen.

• Redui sou kantite alkòl ak manje ki ogmante asid nan lestomak ou.

• Pa pran aspirin oswa medikaman anti enflamatwa ki pa estewoyid (nonsteroidal anti-inflammatory drugs, NSAID) yo.

• Pèdi pwa an plis.

• Fin manje omwen 2 èdtan anvan ou ale nan kabann ou oswa anvan w al kouche.

• Mete tèt ou wo sou kabann ou.