Medikaman oral pou dyabèt tip 2

Tip grenn dyabèt yo

Biguanide yo

Grenn sa yo ede kontwole kantite sik ki nan san w. Yo diminye kantite sik fwa ou pwodui. Medikaman sa a pa fè pankreya ou fè ensilin. Li ede kò w itilize ensilin lan pi byen. Ou souvan pran grenn sa yo avèk oswa apre chak repa. Efè segondè ki posib yo gen ladan yo:

• Dyare

• Anvi vomi

• Vomisman

• Gonfleman

• Anpil gaz

• Gou metal nan bouch

• Bese nivo vitamin B12 nan san an akoz li diminye absòpsyon vitamin sa nan aparèy gastwoentestinal

Fè tcheke nivo vitamin B-12 ou souvan si w ap itilize grenn sa yo pou yon tan long. Sa menm pi enpòtan si ou gen anemi oswa neropati periferik.

Silfonilire

Grenn sa yo ede pankreya ou fè plis ensilin. Pran yo 30 minit anvan yon repa. Pa pran medikaman sa a si ou fè alèji ak medikaman silfamid. Efè segondè ki posib yo gen ladan yo:

• Kantite sik ki nan san w ba

• Pran pwa

• Bese nivo sodyòm nan san an

Inibitè alfa-glikozidaz

Grenn sa yo ralanti dijesyon sik ak lanmidon. Yo ka ede kenbe nivo sik nan san w pou l pa monte wo apre yon repa. Pran yo ak premye bouche chak repa prensipal. Efè segondè ki posib yo gen ladan yo:

• Lestomak balonnen

• Ou anvi vomi

• Dyare

• Anpil gaz

Thiazolidinediones

Grenn sa yo ede kò w pi byen reponn ensilin nan. Ou ka bezwen tès laboratwa pou tcheke fwa ou anvan yo preskri w grenn sa yo. Yo pral tcheke fwa ou souvan pandan w ap pran yo. Efè segondè ki posib yo gen ladan yo: 

• Pran pwa

• Likid siplemantè nan kò ou ak enflamasyon

• Gwo risk pou ensifizans kadyak

• Zo frajil (osteyopowoz la) ak pi gwo risk pou zo kase (fractures)

• Ogmantasyon LDL (move) kolestewòl

Meglitinid

Grenn sa yo ankouraje pankreyas ou ogmante ensilin ou pou yon ti tan. Pran yo avan repa yo. Efè segondè ki posib yo gen ladan yo:

• Kantite sik ki nan san w ba

• Dyare

• Tèt fè mal 

• Yon ti kras ogmante risk pou pwoblèm kè

Inibitè DPP-4 yo

Grenn sa yo ede bese nivo sik ki nan san an. Yo gen mwens chans pou yo fè sik ki nan san an bese. Men yo ka lakoz sik nan san an bese si yo pran yo ak silfonilire oswa ensilin. Ou pran yo yon fwa pa jou. Efè segondè ki posib yo gen ladan yo:

• Enfeksyon nan aparèy respiratwa siperyè

• Nen bouche oubyen nen k ap fè dlo

• Gòj fè mal

• Tèt fè mal

Y ap etidye lòt efè segondè yo.

Inibitè SGLT-2

Grenn sa yo ede bese nivo sik nan san nan moun ki gen dyabèt tip 2. Yo retire sik ki anplis la nan kò ou. Yo fè sa pandan y ap voye sik la nan ren ou. Efè segondè ki posib yo gen ladan yo:

• Enfeksyon irinè

• Enfeksyon jenital chanpiyon lakoz, espesyalman lakay fanm yo

• Pèt likid (dezidratasyon)

• Tansyon ba

• Ogmantasyon risk pou zo kase

• Asidosetoz pandan sik ki nan san sèlman yon ti kras pi wo pase entèval nòmal la

FDA a bay yon avètisman sekirite pou kanagliflozin, yon inibitè SGLT-2 Dènye etid yo te montre ke medikaman sa ogmante risk anpitasyon pou janm ak pye yo. Lè w ap pran medikaman sa a, di founisè w la sa touswit si w gen nenpòt nouvo doulè, maleng (ilsè) oswa enfeksyon nan janm ou oswa nan pye w. Pale ak founisè w la anvan ou kanpe sou nenpòt medikaman pou dyabèt. 

Medikaman nan klas sa yo te montre pafwa yo ka ogmante risk pou zo kase tou. Ou dwe itilize yo avèk anpil prekosyon si ren ou yo pa fonksyone byen.

Agonis reseptè dopamin D2 (mezilat bromokriptin)

Grenn sa yo ede bese nivo sik nan san nan moun ki gen dyabèt tip 2. Efè segondè ki posib yo gen ladan yo:

• Anvi vomi

• Vomisman

• Sansasyon fatig ak fèblès (fatig)

• Toudisman

• Tèt fè mal

Agonis reseptè GLP-1

Yo bay medikaman sa yo prensipalman sou fòm piki (enjeksyon). Men omwen 1 nan sa yo vini sou fòm grenn kounye a. Yo pran li anvan manje maten. Li aji nan ogmante kantite ensilin pankreya a pwodui lè wap manje. Li pa ta dwe lakòz sik nan san an bese, sof si yo itilize li ak medikaman ensilin oswa silfonilireya.

Efè segondè posib nan klas medikaman sa a gen ladan yo:

• Anvi vomi, vomisman oubyen dyare

• Pankreyatit

• Yon gwo risk posib pou yon sèten fòm timè tiwodyèn ki ra (yo wè nan etid sou lòt bèt)

Konbinezon grenn

Medikaman sa yo ka ede kenbe sik nan san ou nan nivo entèval ou sible a Yo ede pankreya a ou tou fè plis ensilin. Epi yo ede mis ou yo itilize ensilin lan pi byen. Efè segondè yo depann de ki kalite konbinezon ou itilize. Founisè ou a ka di w plis.

Siveye sentòm sik nan san ki ba

Sentom yo gen ladan yo:

• Tèt fè mal

• Tranbleman oswa vètij

• Grangou

• Po frèt ak mwat

• Swe

• Yon batman kè di, rapid

• Konfizyon oswa akaryat

Si w panse sik nan san ou ba, verifye yon echantiyon san ak yon mèt Si nivo an ba, manje 1 nan manje rapid sa yo ki anba a. Yo ka ede w ogmante nivo sik nan san byen vit:

• 3 a 4 tablèt glikoz

• 1 pòsyon jèl glikoz

• 1/2 tas (4 ons) nenpòt ji fwi

• 1/2 tas (4 ons) soda regilye (se pa rejim).

• 1 ti kiyè siwo myèl oswa sik

• 5 a 6 moso bonbon di

Retcheke sik nan san w apre 15 minit Si li toujou ba, manje yon lòt pòsyon. Si li rete ba apre dezyèm goute a, chache swen medikal.